2007/02/11

أ/عمرو خالد و "كيف ولمن نستمع"




بسم الله الرحمن الرحيم

السلام عليكم ورحمة الله وبركاته

جاءت فترة هوجم فيها الأستاذ عمرو خالد بشدة .. وكثر إنتقاده والجدال الدائر حوله .. كأن مشاكلنا جميعا قد حلت ولم يتبق لنا إلا المشكلة الأعظم : أخطاء أ/عمرو خالد


.. أولا لنتفق على شيء :

لا ننكر إنه قام بأعمال رائعة وعظيمة .. وعمل اللى لا أنا ولا أنت ولا الكتير في عصرنا ده عمله واللى المفروض من صميم واجبنا .. على الاقل هو قدر بتوفيق من الله إنه يجتذب عدد كبير من الناس للتدين ..

بقى نقطة الخلافات اللى حصلت حوله .. فدي ردها أبسط من البساطة نفسها مين يقدر يقول لبشر متغلطش أو يقدر يقول للناس اتفقوا على شخص معين ..
وده مش معناه إن الغلط اتحول لصح أو إن خلاص ولا كأن حاجة حصلت .. بالعكس هو في موقع مسؤول ويساءل وربما أكثر من غيره .. لكن في نفس الوقت بجد الهجوم اللى كان عليه كان بشع ..

من الآخر عايزة أقول :
إن فيه منهج جميل جدا في القرآن الكريم بيرشد بطريقة أو بأخرى ازاى نتعامل مع الأشخاص والكلام اللى بنسمعه من هنا وهناك من أي مكان .. المنهج في الآية اللى بتقول :

بسم الله الرحمن الرحيم

الذين يستمعون القول فيتبعون احسنه اولئك الذين هداهم الله واولئك هم اولوا الالباب الزمر (آية:18)

ومن تفاسير هذه الآية :

قَالَ اِبْن عَبَّاس : هُوَ الرَّجُل يَسْمَع الْحَسَن وَالْقَبِيح فَيَتَحَدَّث بِالْحَسَنِ وَيَنْكَفُّ عَنْ الْقَبِيح فَلَا يَتَحَدَّث بِهِ .

وسمعت كمان : يستمعون القول (كــــله) الأحاديث من هنا وهناك والكلام .. يسمع .. فياخد الكويس ويسيب الباقي .. وهو ده المنهج والأصل في تلقي المعلومات .. مش عشان أنا بحب اسلوب الشخص ده أو تفكيره خلاص بقى كلامه مقدس - حاشا لله - أو على العكس بكره طريقة الشخص ده فمش حاخد منه لا حق ولا باطل !!
وده نفس المنهج اللى بمشي عليه سواء في حياتي أو قرآءاتي أو متابعتي للمنتديات

منهج مريح ومربح قوي .. لأن عمر ما حد حيلاقي واحد تفكيره كامل .. (التكامل) بين أفكار الناس هو اللى -من وجهة نظري- بيبني فكر متميز إذا أحسن الإنسان الإنتقاء والإستماع

مرة قريت عبارة عجبتني قوي .. بتقول ما معناه إن العقل مش لازم يكون (سلة مهملات) معندهاش مانع تستقبل كل حاجة وتحتفظ بيها ( زي العلمانيين كده ونظام "كلنا اخوات وبشر يا جماعة ومعندناش مشكلة كلنا واحد برضة ").. أكبر غلط .. أنا كمسلم سني مفيش زيي دايما الواحد يفكر نفسه :

قُلْ يَا أَيُّهَا الْكَافِرُونَ (1) لَا أَعْبُدُ مَا تَعْبُدُونَ (2) وَلَا أَنتُمْ عَابِدُونَ مَا أَعْبُدُ (3) وَلَا أَنَا عَابِدٌ مَّا عَبَدتُّمْ (4) وَلَا أَنتُمْ عَابِدُونَ مَا أَعْبُدُ (5) لَكُمْ دِينُكُمْ وَلِيَ دِينِ (6)

وفي نفس الوقت كلامي مش معناه إن مفيش ناس وعلماء وشيوخ متميزين الواحد يحب يسمعلهم وياخد منهم ..

يا ترى هل في حديثي شيء من الصحة ؟

هناك 13 تعليقًا:

  1. ما شاء الله

    هو ده المطلوب ناخد الكلام الحلو و نترك
    القبيح أحسن حاجه ثقافة الوسطيه فيه ناس
    مثلا تاخد كل حاجه من الغرب الوحش و الحلو
    وناس تانيه مستحيل تاخد حاجه منهم حتى لو حلوه
    لكن الأفضل أن أحنا ناخد الحسن ونترك القبيح ..

    فعلا منهج مريح جدااااااااااااااااااااااااا وقوى
    أحييكى بشده على جملة منهج مريح جدا دى

    لكن ده مايمنعش أن فيه ناس لازم الواحد يعمل
    بلوك عليهم تماما زى اللى بيتجاوزا الخطوط الحمراء
    فى كلامهم لأن الواحد بيتقرف منهم حتى لو عندهم حاجه
    حلوه الواحد يستفيد بيها و أكبر مثال على كده هو قله من
    المدونين اللى تلاقى عندهم فعلا حاجات مفيده للغايه لكن بتبقى
    الصدمه لما تلاقيهم تجاوزا الخطوط الحمراء فى مدوناتهم

    ردحذف

  2. فعلا أنا ببقى عايزة أشارك في مدونات فعلا فيها موضوعات حلوة جدا .. لكن لما بلاقي مواضيع مش تمام ببقى حاسة إن اى مشاركة ليا ترويج للمدنة دي ولو حتى ب 1 في الالف .. فبقرأ الكويس وبسيب الباقي ومش بشارك والغالب مش برجع للمدونات دي تاني ..

    الوسطية والإسلام ده كان اسم ملتقى ومؤتمر اتعمل هنا في الكويت ولسه آثاره موجودة :) ..

    طبعا اللى نسيت أقوله -وهو بديهي-إن مرجعنا عشان نعرف الكويس من غيره هو الإسلام والقرآن ..

    :) منهج مريح ومربح ..

    شكرا لتعقيبك .. تحياتي

    ردحذف
  3. اتفق مع الاخ مبرمج فى وجود عدد من الخطوط الحمراء التى يحتاج تجاوزها لوقفات
    عامة انا اتبع هذا الاسلوب بالضبط مع الاستاذ عمرو خالد و نتمنى التوفيق و السداد لجميع الدعاة

    ردحذف
  4. Nice ..
    You maybe intrested in adding your blog to the new egyptian bloggers community .. at: http://www.egybloggers.org

    Thanks.

    ردحذف
  5. انا متفق معاكم تماما
    لكن لازم ناخد الحلو من اي مكان والا هنقفل على نفسنا فى زاوية ضيقة جدا وممكن نخسر كتير بسبب تجاهلنا لحاجه ممكن تفيد

    وبالنسبه لعمرو خالد
    كثر اللغط حوله واصبح الانسان فى حيرة من امره بخصوصه
    ولكن الشئ الاكيد الذي اعرفه جيدا
    ان هذا الانسان افادنا كثيرا
    واهتدي منا الكثير على يديه
    واحيا الصحوة الاسلامية فى قلوبنا
    رغم الكثير مما اخذ عليه
    خاصة الهجوم الذي فتح عليه من الشيخ وجدي غنيم وقد تكلم حقيقة فى اشياء شوهت كثيرا من صورة عمرو خالد
    ارى انى ابتعدت عن الموضوع ولكن عذرا فمسار الحديث رمى بى الى هذه المنطقة

    دمتم جميعا بخير

    ردحذف
  6. كلام جميل و مريح ,بس كان محتاج تكملة. انا شايف انك قدمتي فكرة عامة عن موضوع الخلاف بس معلش آسف يعني ده أصله في الأول و الآخر موضوعك انت فآس على تدخلي,انت كده مقدمتيش كامل الفكرة عن الإختلاف مع أ/ عمرو خالد بغض النظر عن كونه أحطأ أم أصاب فهو رائع و يعرف كيف يستغل الفرص و الأحداث من حوله في نطاق شرعي لا يحرج عن حدود الله و عن حود الشرعية و عاداتنا و تقاليدنا

    ردحذف
  7. شكرا لك أ/يعقوب و لا داع للإعتذار مطلقا بل تقييمك للموضوع يهمني .. ..

    لم يكن هدفي أن أناقش الخلافات حول الأستاذ / عمرو خالد جزاه الله عنا خيرا أو أن أعد دراسة أو بحثا أو مقالة تناقش الآراء .. فالمنتديات مليئة بالنقاشات والإتهامات والرد عليها .. والخلافات حوله انتشرت بما يكفي لأن اطمئن أن معظم قراء تدوينتي يعرفون عنها ولو اليسير .. ولا أخفي عليك سرا لم أتابع الخلافات ولست أعرف عنها الكثير .. الهدف كان التعليق على جزئية هي (لمن ولم نستمع)وربما كان نوعا من الفضفضة أيضا.. أنا متابعة جيدة للأستاذ عمرو خالد وأحضر ندواته التي تقام هنا في الكويت وأدعوا له دوما .. فهو جزاه الله عنا خيرا فعل (ولن أسرد إنجازات فيكفي اليوم في زمن لم يعد أحد "يفعل" فيه شيئا أن اقول "رجل تحرك") .. وخطا خطوات إيجابية .. وقليل منا من فعل واستخدم الأفعال بدلا من الأقوال

    ردحذف
  8. أعلم هذا جيدا أخت مها أن موضوعك لا يدور حول أخطائه او صوابه أعلم جيدا أننا لا يجب أن نقييمه لأننا بكل بساطة ليس لنا الحق في ذلك إلا لو كنا على نفس المستوى من علمه و عمله....و موضوعك هذا من أحسن المواضيع المتداولة الأن مع أني لم أقرأ أي من المواضيع الأخرى المتعلقه ب أز/ عمرو لإقتناعي بعدم أهميتها

    ردحذف
  9. أ/ يعقوب

    المشكلة ليست في النقاش حول الأستاذ عمرو خالد .. المشكلة أن يأخذ هذا النقاش وقت أطول من وقته الطبيعي .. وحجم أكبر من حجمه الطبيعي وهذا ما يحدث للأسف ..

    شكرا لك ..

    ردحذف
  10. وصلت وجهة نظرك...عندك كامل الحق.و شكرا

    ردحذف

  11. مبروك شكل المدونة الجديد , بس أنتى ما شلتيش البار بتاع جوجل اللى فوق ليه
    رأى الشخصى شيليه أحسن

    أنا لقيت طريقة سهلة و سريعة جدا عند علا هنا عشان تشيله لو حبيتى

    ردحذف
  12. الله يبارك فيك :)

    البار بيساعدني في تسجيل الدخول وتحرير المدونة .. بس هو فعلا في بعض المتصفحات واحيانا على بعض الأجهزة بيبوظ شكل المدونة من فوق ..

    بس كويس إن دلوقتي عندي الكود .. حجربه وأشوف .. وما شاء الله مدونة علا جميلة :)

    شكرا جزيلا لك :)

    ردحذف

إنما الأعمال بالنيات وإنما لكل إمرء ما نوى

بحث في فتاتٌ من كلام

Maha's favorite quotes


"إن لمعركة الخبز ضجيجاً يصم الأسماع , والشعوب العابدة لرغيفها سوف تموت دونه , وعلينا أن نوقظ الهمم إلى المعركة الأقسى , معركة الأرض والعرض , معركة الأرض والسماء , معركة الإسلام الذي يترنح من الضربات على كيانه الجلد !!!"— محمد الغزالي