<h2><center><u>النص اتغير !!</u></center></h2>

بسم الله

السلام عليكم

النص اتغير قبل المسرحية بيومييين

آية صديقتنا ومخرجة المسرحية ، كنت رايحة أشتكيلها -كصديقة- إني خلاص من كتر المشاغل والمواعيد النهائية والواجبات اللى عليا حاسة إن الضغط عليا كبير .. فسكتت شوية وقعدت معايا عشان أرتب أفكاري وكده

وبعد ما هِدِيتْ شوية .. بتقولي

-مها

-- نعم آية

- بدي أقولك شغلة (عايزة اقولك حاجة ، هي فلسطينية بالمناسبة)

-- آه يا جميل اتفضلي

(بابتسامة جعلتني أظن أنها تمزح معي)- دورك ممكن يزيد في المسرحية

فضحكت ومثلت أني قد أغمي علي

-أصل في البروفا بتاعه امبارح كان عليها انتقادات وكان قدامي حل من إتنين .. إما إننا نستمر على ما نحن عليه رغم إن الانتقادات منطقية أو إننا نتلافى الخطأ .. وأنا قررت أتلافى الخطأ

طبعا مصدومة بصيت لها .. أولا لأنها مش بتهزر .. ثانيا لأن كلامها منطقي فمش حقدر أعترض .. وده معناه إن نصي حيتغير بعد ما تعبت في إني أظبط حركاتي وانفعالاتي والسلاسة في قول النص

الحمد لله إني اتربيت أكون مرنة .. فقلت لها طيب يلا نراجع النص الجديد مع بعض وبالفعل

الناهرده بقى البروفا النهائية .. ربنا يستر بجد .. المسرحية اتغيرت فيها أجزاء صغيرة من هنا وهناك بس الأساس موجود .. بس طبعا حركة متطلعش من محترفين (ومين قال إننا محترفين!) .. الله يستر

دعواتكم بشدة :)

التعليقات لديها ما يغني التدوينة أكثر .. أراكم هناك إن شاء الله