أول تاج

بسم الله الرحمن الرحيم

السلام عليكم ورحمة الله وبركاته

أول تاج ليا في عالم التدوين .. ونزلته باستعجال شوية + نقص خبرة .. لكن حنتعلم إن شاء الله ..

تعريف سريع بالتاج كما فهمته .. هو بضع أسئلة يمررها المدونين لبعضهم البعض .. ومرر لي هذا التاج (لست أعرف له ترجمة باللغة العربية) بواسطة : مبرمج حر

اسم مدونتك ؟

كان في الأول صندوق باندورا .. والسبب قلته في تاني تدوينه ليا ..

أما ليه غيرته لـ (كلمة وواقفة في الزور) فالسبب حاجتين أولا لأن كل اللى قرا اسم (باندورا) المرأة في الأسطورة .. افتكرها (بندورة) اللى هي طماطم بلغة أهل الشام ..
مجرد التفكير في إن حد يفكر إني مسمية مدونتي (صندوق الطماطم) بتوجع بطني .. الإسم سوقي أصلا ويوحي ب (الروشنة الزيادة) .. بيفكرني بالأغاني العجيبة اللى طالعة (العنب والبطيخ والبتنجان .... الخ !!!) ..

السبب التاني إني - مؤخرا - ولأسباب لا حصر لها .. لم تعد تخرج الكلمات من فمي وعقلي متدفقة كالماضي .. ربما هو العالم من حولي والحال المؤسفة التي وصل لها المسلمين والعرب .. الحروب والذل والإهانة .. بجانب المشاكل الشخصية - وعلى رأي المثل همي أنا أوجع - فأصبحت تعليقاتي على الأحداث والنقاشاتي أقل عددا .. يعني لما أفتح موضوع وأتكلم فيه بيكون كلمة ووقفت في زوري ولازم اقولها ..

لماذا اخترته.. ماذا تقصد به ؟

اده هو السؤال اللى فوق مش كان بيسأل عن السبب .. أوبس .. طيب راجع اجابة السؤال الأول بقى

هل فكرت في إغلاق المدونة.. والسبب ؟

لا ليه تتقفل .. أنا بحب الأبواب المواربة دايما .. يعني آخر لو خلاص مش عايزة المدونة حسيبها كده زي ما هي ..لكن مفكرتش طبعا إني أسيبها .. بس الفكرة إن مقدرتي على (بدء / إنشاء) موضوع جديد مش زيها لما أجي أعقب على موضوع ما أثار إهتمامي ..

صورتك فى المدونة ..رمزيتها ؟

كانت في الأول صورة لطفل بيبص من فتحة قفل باب (فضول) وكانت مناسبة لفكرة المدونة أيام ما كان اسمها (صندوق باندورا) وبعدين غيرتها لصورة الباب اللى على المحيط ..

(وراء الباب المغلق) ده اسم رواية رائعة لد. أحمد خالد توفيق في سلسلة ما وراء الطبيعة .. دوما الأبواب المغلقة تثير حفيظة الإنسان وفضوله .. نتذكر أبواب قصة أليس في بلاد العجائب .. والباب الألف في قصة الزوجة الجديدة للرجل اللى في بيته ألف باب .. وقالها ممكن تفتحي الأبواب كلها ما عدا الباب الألف .. طبعا الأخت سابت ال 999 باب ومسكت في الأخراني وفي أمثالنا :

إذا رأيت بابا مغلقا فاعلم أن وراءه أمرا فتعمل في فتحه (ابن عربي)

والمثل المشهور : ( الباب اللى يجيلك منه الريح سده واستريح ) واللى حوره الأستاذ الكبير / محمد مستجاب في كتاباته الساخرة الرائعة إلى :

- الباب الذي يأتي منه الريح، لا تغلقه جيدا كي تستريح، فسوف تحتاج إلى قليل من النسيم.


طبيعة كتابتك فى المدونة بشكل عام ..سياسة ..قصة ..عبث ..كلام فاضى ؟

ولا واحده من اللى فوق .. أو نقدر نقول كلهم .. هي زي مساحتي الخاصة اللى بفضفض فيها في المجالات والموضوعات اللى تهمني .. فهي مدونة شخصية أكتر منها موجهه (أقصد تحمل رسالة او توجهها .. وما شابه)

لماذا تدون أصلا ؟

عيبي الفظيع هو الرد على الأسئلة قبل ما تطرح من الأصل .. من جديد :) .. أكتب للفضفضة و تبادل الآراء وطرق التفكير حول الأمور التي قد يقدر لأي منّا أن يقابلها في حياته اليومية .. أكتب كي أوصل معلومة .. وفي المقابل أتوقع أن تصلني معلومات .. فيكبر هذا الشيء الموجود داخل الجمجمة :D

أحلى جملة قيلت لك فى وصف مدونتك ؟

هي المدونة فيها إيه أصلا عشان يتوصف :D


التعليقات بالنسبة لك ..أهميتها ؟

هي الجزء المكمل للتدوينة .. يعني ما أكتبه هو نصف الشكل العام اللى عايزة أشوفه للموضوع .. رأي القراء مهم جدا ..


أحلى بوست كتبته ..ضع اللينك ..ثم اذكر لماذا ؟

ما زلت في البداية .. عموما أحسن تدوينة هي : (عمرو خالد .. لمن ولم نستمع ؟) .. أما ليه هو أحلى بوست .. لأنه أول تدوينة بقول فيها نظرية ورأي ليا في موضوع معين


أفضل مدونة قرأتها ..يمكن اختيار عدة مدونات ؟

مدونة العزيزة جدا داليا يونس (في مملكة جيرالدين)

وبما إني لست خبيرة لهذه الدرجة في المدونات فسأختار كل المدونات التي أعرفها :

بنت سعد

ربة السيف والقلم

في مملكة جيرالدين

مستنية الفرج

كش ملك

يتنفس بصعوبة


أفضل بوست قرأته ..يمكن اختيار اكتر من لينك ؟

أفضل تدوينة .. همممممم .. سؤال صعب .. سأترك لكم البحث في المدونات السابق ذكرها


هل خسرت صديق بسبب كتابة هنا ؟

لم أخسر أحدا في حياتي ولله الحمد لأي سبب من الأسباب ..


حد قل ادبه فى التعليق ..ايه رد فعلك ؟

لا الحمد لله برضة محصلش .. ويمكن ده - بعد ما هو رحمة من الله علي -لأني بتجنب الإعلان (بقصد) عن مدونتي في كل مكان .. تجنبا لمواقف كهذه


أسوأ مدونة ..الاجابة اجبارية ..يمكن اختيار عدة مدونات ..هما كتير اصلا ؟

مدونة جورج بوش و شارون إن وجدت ..

أسوأ بوست ؟

كل تدوينة تتعدى قوانين النشر وآداب الحوار والحرية فهي ضمن أسوأ تدوينة


أسوأ مدون ..مهو هتجاوب هتجاوب ؟

لو مفيش فايدة .. يبقى أسوأ مدون..... (مين اللى طفى النور )