2007/06/29

تاج شخصي

بسم الله الرحمن الرحيم

السلام عليكم ورحمة الله وبركاته

المرة دي بقى تاج ابن حلال قوي من فلونا

انت مين ؟؟

كل ما أقرأ السؤال ده يخطر في بالي القصيدة التالية :

أنا من أنا !


أنا محض أفكار تلاشت في زحام الأرصفة


شباك نافذة تهشم بعد مائه عاصفة

وحطام قنديل هوى
في مدلهمات الشوارع والحواري ,

في سحيق الأمسيات الزائفة


الغريبة أني أدمن قرآءة هذه القصيدة وهي ليست لكاتب معروف أو مشهور .. وبالطبع ما أوردته بالأعلى هو جزء منها

عموما دون فلسفة .. أنا فتاة .. مسلمة .. أتبع السنة .. مصرية .. مغتربة .. لها أحلام وأحزان مثل ملايين الفتيات .. وأختلف عن ملايين الفتيات ، أقسمهم ق
سمين .. قسم يحاول الإهتداء بالاستعانة بالله .. وقسم يهرب منه .. أرجو أن أكون من القسم الأول ..

أنا فتاة تغيرت كثيرا .. تتذكر كلما أذنبت أنه لولا فضل الله عليها ما كانت على ما هي عليه الآن فتعود إليه تخاف عقابه وترجو رحمته وتكره ما جنته يداها من معصية ..

أنا فتاة مازالت لم تستطع أن تخرج الطفلة من كيانها (بما يحمل هذا من ميزات وعيوب)



مين اكتر ست اشخاص بتحبهم ؟؟

أكتر ست أشخاص بقدرهم وبحبهم من الأحياء طبعا ..

والدتي ،
من إخواتي "علاء" 8 سنين (اتنين زائد واحد يسااااوييي هممم "حد يغشش أمال")،
من أقاربي خالي (كده خمسة صح !!)

من صديقاتي "إيمان ز" (وصلنا ولا فاضل !) .. ممن دون ذلك تأتي شريحة كبيرة من أمهات صديقاتي و صديقات أمي والأخوات الأكبر سنا لصديقاتي ونساء ألتقي بهن في ملتقيات دورية (معلش زدت عن الستة حبة )

طيب لو مش أحياء - أكثر من أحب هم
الرسول صلى الله عليه وسلم ،
إبراهيم عليه السلام ،
أبو بكر وعمر رضي الله عنهما ،
أبو هريرة رضي الله عنه ،
جدتي -والدة والدتي- الله يرحمها


انت سعيد؟




الحمد لله .. أنا الإنسانة الأكثر كآبة أحيانا وأسعد إنسانة أحيانا أخرى .. أنا من النوع اللى بيطلع لسابع سما وينزل لسابع أرض في حكاية الفرح والحزن دي


لو اجتمعت انت وحسني مبارك في غرفة واحدة؟





اللى بعده

لو معاك مليون ونص جنيه......تعمل بيهم ايه؟


الدنيا علمتني إن الإنسان ممكن يكون مقتنع بمبادئ وعنده قناعات وكل ده "قد" يتغير في الإختبارات الفعلية في مواقف الحياة المختلفة ، ده فضلا عن إن الكلام حاجة والفعل حاجة تانية - بشكل عام يعني ، فما سأقوله هنا مجرد تخمين بعد وإحتمال يقوم على أساس واه .. لأني لست في هذا الموضع الحرج

عموما ما رأيكم في إجابة مثالية متفزلكة لا أدعي أنها لي ولكن لم لا تكون كذلك في المستقبل ..
مليون ونص .. المسلم لا يطمع في أقل من عشرة أمثال ملك ملك ملوك الأرض ، ونتكلم هنا عن مليون ونص (وجنيه كمان مش دولار مثلا ) الطبيعي إن الواحد يقسمهم جزء للصدقة وأعمال الخير .. وجزء لضروريات حياته ، ولا يضعهم أبدا في قلبه


بتحب مصر؟

سؤال غريب

بتحب البنات؟

سؤال صيغته واسعة ومش محددة عامة فالسؤال يذكرني
بالآية في سورة الشورى : { لِلَّهِ مُلْكُ السَّمَاوَاتِ وَالْأَرْضِ يَخْلُقُ مَا يَشَاء يَهَبُ لِمَنْ يَشَاء إِنَاثًا وَيَهَبُ لِمَن يَشَاء الذُّكُورَ (49) أَوْ يُزَوِّجُهُمْ ذُكْرَانًا وَإِنَاثًا وَيَجْعَلُ مَن يَشَاء عَقِيمًا إِنَّهُ عَلِيمٌ قَدِيرٌ (50) }

انت مسلم ؟

الحمد لله


ليه؟

سؤال جميل والله .. أولا لأني اتولدت مسلمة الحمد لله ، ولأن الكفر غباء ، أتذكر مقولة الشيخ الشعراوي رحمه الله في تعريف الكفر لغويا .. هو تغطية الشيء وستره وإخفاؤه .. وهذا يؤكد وجود شيء ، وأعطى رحمه الله مثالا على هذا فقال لو إنك داخل بيتك ومعاك حد من أصحابك حتقوله لحظة وتدخل تقفل الأبواب على أهل بيتك أو تنزل الستائر ، لو مفيش حد لما كان ذلك ضروري .. وبما أن الله موجود فهو
مستحق للعبادة والشكر ،

وبالإسلام (وبالإسلام وحده ) يتقبل الله شكري له على نعمه وصلاتي ونسكي وصالح أعمالي ولأنه الدين الحق الكامل ولأن به أنا حرة من عبادة كل ما دون الله ، وبه وأكسب دنياي وآخرتي


مين أكتر شخصية ما تقدرش تستغنى عنها في حياتك؟وليه؟

ايه أكتر جزء في الكومبيوتر متقدرتش تستغنى عنه : الكيس
ولا الشاشة ولا لوحة المفاتيح / الفأرة ؟؟

لو فُقد أي واحد فيهم الجهاز مش حيكون نافع !! ونحن في الدنيا نكمل بعضنا بعضا .. لأبي وأمي دور في حياتي ، و لأخوتي دور و لصديقاتي دور ، ولأقاربي وجيراني و زملائي وأساتذتي .. الخ

ايه اكتر موقف محرج اتعرضت ليه في حياتك؟واتصرفت ازاي؟



كتيييير أنا من الناس اللى بتحرج هوا ، وأكتر موقف حيكون محرج لو اتكلمت عنهم ، وعادة بتصرف فيهم بذكاء حاد ينم عن قوة تحوصل فحلقي في الثنايا العليا للمخيخ


ايه الأمنية اللي بتدعي ربنا دايما انه يحققها لك؟

أن يتوقف قلبي عن النبض على رضى من الله


تمرر التاج دة لمين؟

آآآه .. تقريبا الوسم عدى عالكل .. عشان كده أنا أناشد كل اللى قرأ الوسم ومجاوبش عليه يكون هو اختياري في تمرير التاج





التعليقات لديها ما يغني التدوينة أكثر .. أراكم هناك إن شاء الله

هناك 16 تعليقًا:

  1. يااه هو فيه ناس لية ما جاوبشو ع التاج
    وكمان عندهم إجابات جميلة
    جميلة إجابة الكمبيوتر وإن الأجزاء تكمل بعضها
    وجنيلة إجابة التخلص من المواقف ومن ضمن المواقف التي تخلصت منها هو الإجابة على السؤال نفسه

    ردحذف
  2. عجبتني اوى اوى اجابة الكمبيوتر و اجزائه الي ماتعرفيش تستغتني عنها دي
    :):)

    ربنا يباركلك و يعزك
    :)

    التاج عندي بقاله كام سنة كده :rolleyes:

    وعادة بتصرف فيهم بذكاء حاد ينم عن قوة تحوصل فحلقي في الثنايا العليا للمخيخ
    :lol:

    ردحذف
  3. ماشاء الله
    اجابات جميلة جدا
    و بالذات حكاية المخيخ
    واضح ان المخيخ عندك محتاج استئصال
    اعرف دكتور عشرة على عشرة
    و مش هياخد كتير

    تحياتي :)

    ردحذف
  4. السلام عليكم
    التاج ده انا شوفته كتييير في موسم تطاير التاجات
    بس اول مرة أشوفه بالأناقة ديه
    أجابات مدروسة
    ونقدر نقول ملعوبة

    ردحذف
  5. أ/عصفور

    أصلا أنا عرفت أن الوسم ده اتمررلي من يومين بس .. أسرع وسم جاوبته .. وجزاك الله خيرا :)

    حبيبتي المجاهدة

    ربنا يرزقك الجنة ويجازيك عني خير

    أ/علاء

    الحمد لله .. المهم أن تكون الإجابات مفيدة أو أضافك فكرا .. شكرا لك ، بالمناسبة ربما ترى أحدى الأخوات هذا مزاحا لا يليق أرجو أنك لا تمزح دوما مع الأخوات بهذا الشكل :)
    جزاك الله خيرا على المرور والتعقيب :)

    أ/بينو

    وعليكم السلام ورحمة الله وبركاته

    سبحان الله الذي يلهم الإنسان ما يقوله دون حول من الإنسان ولا قوة

    جزاك الله خيرا وبارك الله فيك

    ردحذف
  6. جميلة اجباتك اختنا ...

    خصوصا بتاعت الكمبيوتر ... اه انا مش جاوبت على التاج ده


    :) بارك الله فيكى اختنا

    ردحذف
  7. هو حسيا ان التدوينة كلها بتدخل في تطاق اجابة سؤال من انا

    التدوينة جميلة ..

    ردحذف
  8. أردت فقط أن أوضح أن هذه قصيدة موزونة وليست نثرا، وإن كنت لا أدري من قائلها:
    أنا من أنا !
    أنا محض أفكار تلاشت فى زحام الأرصفة
    شباك نافذة تهشم بعد مائة عاصفة
    وحطام قنديل هوى
    فى مدلهمات الشوارع والحوارى،فى سحيق الأمسيات الزائفة
    ***
    أنا شاعر لبس العباءة وامتطى ظهر القصيد
    لكنما_ هل تنضج النيران من حطب الجليد!
    أنا محض طفل أجهضت فيه البراءة والسنا
    فإذا تبسم هل ضحوك أم شريد!
    ***
    أنا كل أوجاع الذين رأيتهم
    قبلى على وتر القصيدة يذبحون حروفهم ، يتساقطون
    أنا ابن هذا الجيل، أكبر ضائع
    وأنا المعلق رأس ضادى فوق مشنقة الفنون
    ***
    الحرف يسكن أضلعى ... لا أدعى!
    من ألف عام بل يزيد
    ودبيب أصوات القوافى مسمعى
    ما هزنى شوق إلى عزف وما رفت مع الأحلام أسراب النشيد
    وجميع أعشاش المعانى مضجعى
    حينا نحلق فى السما
    حينا نحلق فى المدى
    حينا نحرق جلدنا لنعود فى جلد جديد
    ***
    أنا صيحة الماضى أنا...
    ومصيبتى أنى يصدقنى أنا...!
    أنا ابن هذا الجيل والشرق المقيم على حدود المهزلة
    أنا ألف بيت حوكمت فى معقل الطوق المقيم على حدود المقصلة
    أنا ثورة فى الشعر أجهدها الدجى وأبات فيها معوله
    تحياتي

    ردحذف
  9. جميل جدا واجمل اجابة ان يتوقف القلب وربى راضى عنى فعلا والله هذه اغلى امنية فى الحياة فالدنيا سجن المؤمن ولا يريد ان يتركها الا على طاعة اللهم ارزقنا

    ردحذف
  10. أ/بن توفيق

    إذا في انتظار اجابتك عليه إن شاء الله :)

    وفيك بارك الله

    أ/محمد

    صحيح .. أحسست أن الأسئلة تدور حول شخصية المدون

    شكرا لك

    المجهول

    جزاك الله خيرا للتوضيح .. قرأت القصيدة منذ سنوات في مجلة العربي الكويتية وأعجبتني للغاية .. كانت مشاركة من أحد القراء

    رائعة جدا أليس كذلك :)

    إمام الجيل

    اللهم آمين
    جزاك الله خيرا

    ردحذف
  11. تاج جميل
    اجابات جميلة
    ربنا يكرمك يامها

    على فكرة انا ماشاركتش فى الترشيح بكل أسف لكن للعلم انا كنت هارشحك
    مدونتك جميلة وقيمة
    متضايقة بس ان ممكن يكون الصوت بتاعى فى الترشيح كان هو الفرق بينك وبين اللى قبلك على طول
    مش هاتأخر تانى فى حاجة زى دى ان شاء الله

    ردحذف
  12. مش عارفة اقول ايه ؟؟

    انا بحبك فى الله اوى يا مها

    :):)ونفسي اتكلم معاكى تانى

    ردحذف
  13. تاج جميل و اللي عجبني اكتر طريقتك في الرد على اسئلة التاج بالصور لذيذة فعلا..تحياتي ليكي

    ردحذف
  14. مناجاة

    جزاك الله خيرا على الدعاء .. ربي يجعلّك من دعاء الصالحين نصيب

    آآآآه .. مشاركتيش في التصويت .. لا لا .. كده لازم تعويض فوري ..

    دعوتين كده بالإخلاص والهداية وحب الآخرة وتفضيلها على الدنيا :)

    ربنا يعزك بالإسلام

    المجهولة (أم مريم ؟ ولا مين)

    أحبك الله الذي أحببتني فيه

    ومادام كان فيه مكالمة أولى إن شاء الله حيكون فيه مكالمات تانية :)

    أ/شريف

    شكرا لك والحمد لله

    ردحذف
  15. السلام عليكم ورحمة الله وبركاته

    موضوع أعجبنى جداً .. رائع طرحك مثل عقلك



    انت مين ؟؟انت مين ؟؟

    مسلم .. رحال فى دنيا الترحال

    أحاول أن أكون كما أتمنى وليس كما يتمنى الاخرون

    هذا انا .. أبن الارض والنيل .. له ثوابت لا يغيرها


    مين اكتر ست اشخاص بتحبهم ؟؟

    والدى .. رحمة الله عليه

    والدتى وأخوتى

    محمد أبن أخى .. عفريت البيت هههههه

    مشا ءالله عليه ذكاء رهيب .. قريبا صورته بالمنتدى

    صعيدى على النت هههههههه


    انت سعيد؟

    اليوم الذى يمر وانا بصحة وعافية وراضى ..مؤكد أكون سعيد

    وأن لم أكن سعيد .. بقدر الامكان أطلب من الحزن الرحيل

    لو اجتمعت انت وحسني مبارك في غرفة واحدة؟

    أطلب منه أن نترك الغرفة حالا وننزل الى الشارع متنكرين
    حتى يرى الشىء على طبيعته بعيداً عن الغرف المغلقة


    لو معاك مليون ونص جنيه......تعمل بيهم ايه؟

    السعادة الحقيقة ليست فى المال فى الرضى والقناعة

    سأحاول بقدر الامكان وضعه فى مشروع يكون ربحه دنيا وآخرة



    بتحب مصر؟

    كلمة أحبها قليلة عليها


    بتحب البنات؟

    غريب من يفرق بينهم .. لانهم شركاء أساسين فى الحياة

    مؤكد ما يأتى من عند الله خير

    انت مسلم ؟

    الحمد لله وأفتخر بذلك

    ليه؟
    لان الله يحبنى عندما جعلنى مسلماً

    دين بحث فيه كل المستشرقون والباحثون
    من الآلآف السنين يبحثون وبكل شىء فيه مقتنعون


    مين أكتر شخصية ما تقدرش تستغنى عنها في حياتك؟وليه؟

    بصدق .. منظومة الحياة تجعلك لا تتخلى عن كل من حولك

    من أهل وأحباب وأصحاب .. الكل له مكانته


    ايه اكتر موقف محرج اتعرضت ليه في حياتك؟واتصرفت ازاي؟

    لا اخشى المواقف .. بقدر الامكان أتعامل معها بسرعة
    لكن الشىء اللى يحرجنى .. ععندما أتحدث بين مجموعة نساء
    وأجد نظراتهم لى باهتمام وانصات .. أتحاشى النظرة المباشرة لهم

    موقف طريف ومحرج .. كنت فى مشوار واخذت تاكسى وانا فى مصر
    وبالصدفة شاهدت جارة لى تنتظر .. وقفت وناديت عليها وركبت معايا

    وعند البيت ... أشوف المحفظة .. طارت .. ومعها كل شىء

    ههههههههههه .. طبعا عملت جدعة وحبت تحل الموضوع وتدفع

    رفضت .. ودخلت البيت واخذت فلوس وحاسبت التاكسى


    ايه الأمنية اللي بتدعي ربنا دايما انه يحققها لك؟

    أن يرضى عنى ويغفر لى ولوالدى ويجعلنى قادر على فعل الخير

    تمرر التاج دة لمين؟


    الى من يأتى بعدى


    طرح مميز وموضوع جميع أتمنى أن أراه هناك

    وفقك الله ويسر أمورك

    دعواتى لكى بالصحة والعافية

    ردحذف
  16. وعليكم السلام ورحمة الله وبركاته

    بارك الله فيك .. إجابات راجحة تبارك الرحمن .. والموقف محرج جدا بس ما شاء الله اتصرفت :D

    شكرا على الإجابة

    ردحذف

إنما الأعمال بالنيات وإنما لكل إمرء ما نوى

بحث في فتاتٌ من كلام

Maha's favorite quotes


"إن لمعركة الخبز ضجيجاً يصم الأسماع , والشعوب العابدة لرغيفها سوف تموت دونه , وعلينا أن نوقظ الهمم إلى المعركة الأقسى , معركة الأرض والعرض , معركة الأرض والسماء , معركة الإسلام الذي يترنح من الضربات على كيانه الجلد !!!"— محمد الغزالي