لأنها هي الحياة

بسم الله الرحمن الرحيم

السلام عليكم ورحمة الله وبركاته


مين هو الإنسان المعقد ؟؟

ويعني ايه إنسان بسيط أو واخدها ببساطة !!


سؤال وجيه

كنت أكلم أخي عن رأيه في ذهاب أ/عمرو خالد إلى الكنيسة لحضور القداس .. طبعا أنا فتحت الموضوع لأعرف كيف صار به التفكير

أحسست في كلامه بنوع من الإستنكار لموقف أ/عمرو .. لكنه في الآخر قال عبارة هي أساس كتابتي لهذه التدوينة قال :

يعني بصراحة مش فارقة معايا قوي لو راح أو ما راحش

بالمناسبة أخويا ذو عقلية وشخصية جديرة بالإحترام لكن ينقصه الكثير من الخبرات الحياتية والعلم .. وهذا حال كثير من شبابنا بارك الله فيهم

بعدها قرأت في مواضيع على منتديات نقاشات حول هذا الموضوع .. طبعا الآراء عديدة لكني سأركز على أكثر رأيين أثارا اهتمامي

أولهما : من هاجم أ/عمرو خالد بشدة وبدون أي اعتبار ( لأن هذا الشخص كما له من العيوب والزلات له محاسن وأياد ) .. ورغم اني أختلف بشدة مع أ/عمرو خالد في فعله هذا إلا أن هذا لم يمس من عقلي ونفسي كل التقدير والإحترام والشكر له .. لما قدمه ولم نقدمه .. لإيجابيته وسلبيتنا .. لتحركه وسكوننا .. كنت أحيانا أود أن أصرخ في هؤلاء القوم بأن اخجلوا من أنفسكم واغلقوا أفواهكم

لا ليس لإعتراضهم على أ/عمرو .. فأخونا شاب مصري بارك الله فيك وجزاه عنا خيرا قد اعترض وبشدة وكنت من المهنئات له على تدوينته .. ووافقته على كل كلمة جاء بها

لكني استأت من الأسلوب وعلى روح الإعتراض وطريقته التي بدت كأسوأ ما رأيت

زنوا الناس بمحاسنهم وعيوبهم معا





ثانيا : بعض الشباب .. ممن جعلني أتميز غيظا .. مثل أخي الحبيب .. ممن يقولون : يعني هي فرقت ايه .. عادي هو الراجل كفر يعني .. بطلوا تكبروا المواضيع وتعملوا من الحبة قبة .. انتوا ناس فاضية .. الخ هذا الكلام الذي يقطر عسلا

هنا نعود لسؤالي في أول التدوينة :

مين هو الإنسان اللى معقدها ومين هو الإنسان اللى واخدها ببساطة

هممم لأ السؤال مش صح .. خلوني أرجع اكتبه صح


ايه .. هي .. الأمور .. اللى .. تتاخد

ببساطة .. وايه .. اللى .. متعديش

ببساطة


مصر فازت بالكاس .. حلو جميل ألف مبروك .. وخلاص فضينا المولد .. مش نصر حربي يعني

لكن عبارة تغرق ومسؤولين عارفين وتقصير واهمال متعمد .. ده مش المفروض يعدي بسهولة

لما واحد يقولك الممثل الفلاني ده اي كلام .. أما المذيع العلاني ده فـ "مريع"

عادي مشيها ببساطة مش لازم تقعد تكلمه نص ساعة عشان تغير رأيه وتقنعه برأيك اللى عكسه

هنا take it easy as you wish

لكن لما حد يسب في دينك في الإسلام أو يغلط في عقيدتك

عقيدتك اللى لو كل حاجة وهم حتكون هي الحقيقة اللى معندكش شك فيها

ده ميعديش بسهولة .. وyou have to take the hard way here

مقلتش إن الطريق الأصعب إنك تضربه أو تغلط فيه .. لكن حتى الجدال والإعتراض المحترم والنهي بحكمة يعتبر من ضمن سلوكك الطريق الأصعب (والأصح) في تعاملك مع مثل هذا الموقف

جميل إن الواحد ياخدها ببساطة .. والأجمل إنه في الأمور التي تتطلب التوقف وأخذ موقف إنه يتوقف وياخد موقف

والأمور دي حتختلف من شخص للتاني .. عايز تعرف امتى تقف وتاخد موقف


اعرف مين انت وهدفك ايه ؟


كانت صاحبتي بتضرب لنا مثل عن المسلمين وغير المسلمين دلوقتي .. بتقولي كأن الحياة دي بحر

واحنا كمسلمين في سفينة

صحيح مش رائعة الجمال أو ذات شكل مبهر .. لكنها تعرف أين تذهب

تعرف مرساها وأين تذهب رحلتها

أما غير المسلمين .. فهم في سفينة ضخمة شديدة الإتقان والصنع والجمال

لكنها بلا هدف .. ليست تعرف أين ترسو أو كيف هو خط رحلتها

لذا مع جمالها فهي تتخبط هائمة تسير بلا هدف .. أو أن هدفها سراب ووهم

هويتك ايه ؟؟

شوف أول حاجة حتجاوب بيها على السؤال ده

أنا قلت اول حاجة لأني لو اتسألت السؤال ده حيكون جوابي

مسلمة عربية مصرية طالبة وابنه واخت ومسؤولة .. كلها لا تتعارض وكلها أنا .. لكن إلى أياهن ولائي المطلق !!

كمثال : أنا (كابنه) قد يطلب مني والديّ أن آتي كبيرة أو أكفر .. و(كمسلمة) يمنعني إسلامي من هذا .. هنا يظهر ولائي وهنا يكون الإختبار

الفكرة كلها تتلخص إن فيه خلط شديد في الأولويات والمفاهيم

في الثوابت والمتغيرات

فيه الحاجات اللى نعديها عشان الحياة تمشي بأيسر ما نستطيع

وفي الحاجات اللى مش لازم تعدي لأنها الحياة نفسها

لأنها الحياة نفسها

***

حتى لايقهروك يا بني

حتى لا يجعلوا منك عدواً لذاتك لدوداً

حتى لا يوقعوك في شباك التناقض وعذاب الحيرة

حتى تظل عارفا عما تدافع ، ومن تدفع عن نفسك

حتى لا تفقد هويتك ، ولكي لا تنشطر ذاتك ، ولكي لا يتنكّر يومك لأمسك

ولكي لا تصبح حجراً آخر يلقي به أعداء هذا الدين في دروب المسلمين

ولكي يبقى فيك سر قوتك فلا ينزعوه منك فتصبح ذليلاً

لا مع هؤلاء ولا مع هؤلاء

إحذر يا بني أن يفتنوك عن بعض دينك

***

اللهم .. إنك تعلم زوار مدونتي ولا أعلمهم .. فيا رب قدر لهذا الكلام أن يصل للفئة التي أقصدها .. ويسر لهم به طريقا للجنة .. والزمني الإخلاص .. وأعذني من الرياء والعجب .. واغفر لي خطئي وعمدي وجدي وهزلي وكل ذلك عندي .. واجعل هذه التدوينة من الحسنات التي يذهبن السيئات اللهم استجب اللهم آمين

التعليقات لديها ما يغني التدوينة أكثر .. أراكم هناك إن شاء الله