2007/03/13

من هنا وهناك

بسم الله الرحمن الرحيم
السلام عليكم ورحمة الله وبركاته
تدوينة للفضفضة عني
حتكلم عن 3 حاجات :
1. عن دراستي هذا الترم
2. عن صديقاتي
3. عن عالم المدونات والمدونة الجديدة اللى فتحتها
أول حاجة .. دراستي الترم ده بجد قلقانة عليها جدا .. المواد اللى أنا واخداهم كتير وتقال قوي ..
database قواعد بيانات
و operating system نظم تشغيل
وNumerical analysis تحليل عددي
و تصميم برامج تعليمية
ومهارات دراسية
و Linear programming برمجة خطية
يوميا ما عدا الأربع عندي من 9 ونص الصبح لغاية 5 مساء في الكلية ..
و3 أيام (الأحد والتلات والخميس) بكمل من الساعة 5 لغاية 8 في دار القرآن وبرجع البيت على هيئة زومبي أو مصاص دماء أو أي شكل مشابه .. وطبعا مفياش حيل إني حتى آكل مش أذاكر .. ويوم الخميس عندي حلقة من 12 - 3 بتاكل اليوم فعلا .. والجمعة مساعدة في أعمال المنزل الجميلة .. فمش عارفة أروح فين بصراحة ..
ربنا يستر ..
***
ننقل على نقطة 3 لأنها سريعة ولأن عندي محاضرة بعد 5 دقائق .. ألا وهي عالم المدونات اللى قعدت إمبارح أستكشفه شوية .. وبجد دنيا تانية بطريقة لم أتخيلها .. مدونات وناس تعرف بعضها وناس كويسة وناس العكس ومدونات مشتركة و ... و ...
متعة بس بتسحب قوي وبتاخد وقت ..
عموما أنا عايزة أنبه إني فتحت مدونة ظريفة تانية بنفس حسابي ده ..
شوفوها و أشوفكم في التعليقات هناك إن شاء الله

هناك 12 تعليقًا:

  1. إيه ده مدونة فى حاسبات

    أول واحد أعتر عليه فى مجتمع التدوين كله


    ربنا معاكى
    بتاخدوا المواد ديه فى سنة كام

    ردحذف

  2. هو أنا كنت في حاسبات .. بس سبتها ونقلت :)

    كله هـنـا

    ردحذف
  3. شدى حيالك فى الأستمتاع بالمذاكرة و ربنا يوفقك

    لذيذة أوى البرمجة الخطية

    أنا جاى أهنيكى على المدونة الجديدة و أعتبرينى زائر دائم ليها
    وعلى حظك الحلو فيه تدونية هنشرها النهاردة إن شاء الله
    ليها علاقة قوية جداااااااااااااااااااااااااااااااااااا وممكن تفيدك
    جدااااا فى اثراء المدونة الجديدة

    ربنا يكرمك و يوفقك
    :)

    على فكرة أنا لقيت موقع لعمل ال
    mailing list

    ردحذف
  4. ما شاء الله كل ده ناويا تعمليه ربنا يوفقك و يكرمك يا ستى ويحققلك كل ما تمنيتيه و السلام عليكم

    ردحذف
  5. بعد السلام
    ربنا يوافقق وينصر دعوتك ويجعلك افضل المبرمجين
    ده مش بكش ولا علشان الطلب الى هكون سخيف واطلبو منك
    ده علشان اسلوبك حلو اوى فى الكتابه واهدافك وطموحاتك برضو كويسه
    دى مش اول زياره بسانا هكون سخيف واطلب منك كتاب يعلم HTML
    ويريت يكون اسلوبو سهل
    وجزاك الله خير

    ردحذف
  6. ما شاء الله

    فكرتها جميلة المدونة الجديدة

    بس الوانها قاتلة

    ردحذف
  7. وعليكم السلام ورحمة الله وبركاته

    آمين يا تسنيم .. شكرا جزيلا على الدعاء :)

    أ/محمد العناني :

    جزاك الله خيرا على الدعاء ..

    وسأعطيك ما هو أفضل من الكتاب 100 مرة إن شاء الله ..

    هــــذا

    أ/خطاب :

    إخترت هذا التصميم بالذات لأني رأيته في مدونة وأعجبني للغاية .. وعامة ربما أغيره قريبا :)

    ردحذف
  8. حميل جدا إن الواحد يكون عنده حاجة مفيدة تشغلة ..وخصوصا فكرة دار القرآن ده..ده الواحد نفسه يفضى بس ساعة في اليوم عشان يحفظ كام آية..ربنا معاكي.
    المدونة التانية فعلا جميلة,مبروك

    ردحذف

  9. أ/يعقوب :

    الله يبارك في حضرتك .. لا نحفظ القرآن فقط في دار القرآن .. بل ندرس علوم :

    الفقه

    السيرة

    الحديث

    التفسير

    حفظ القرآن

    تلاوة القرآن

    التجويد

    العقيدة

    وبالطبع فيه إمتحانات وشهادة ونتايج وترتيب المتفوقين (الفائقين إن شئنا الدقة في اللغة العربية)

    جزاك الله خيرا على الدعاء :)

    ردحذف
  10. اولا .. الف مبروك على المدونة الجديدة .. بس لو اختى تغيرى الوانها يبقى جزاكى الله خيرا

    ثانيا : ربنا ييسر لحضرتك المذاكرة ودار القرآن
    ويجعل كل لحظة فى ميزان حسناتكم ان شاء الله

    ثالثا : هى المحاضرات اهم من النت والبلوج .. حضرتك قولتى هتتكلمى فى 3 حاجات واتكلمتى فى 2 بس
    كل ده عشان خاطر المحاضرة

    :)

    ردحذف
  11. كنت كاتبة رد و مش اتبعت:s

    خيراً:)

    هقولك كلمة للدكتور عمر عبد الكافي... كان بيتكلم في مرة ان المسلم وقته مش ملكه... و ان وقته اما للدعوة انه يتعلم حاجة جديدة او يعلم حد حاجة جديدة...
    ربنا يكرمك و يثبتك على الي بتتعلميه:) اسأل الله ان يعلمك ما ينفعك و ان ينفعك بما علمك

    سيدنا ابراهيم كان متكئ في الجنة وقت اما الرسول عليه الصلاة و السلام شافه في رحلة الاسراء و المعراج
    و لما سُئل ليه كان متكئ... قالهم لأنه اشتغل و تعب و اجتهد في الدنيا.. و الجنة دار الثواب و دار الراحة بعد التعب في الدنيا
    اسأل الله ان يحييكي للاسلام و يميتك على الطاعة و يبعثك مع الصديقين و الشهداء
    آمين
    :)


    صحيح... المدونة الجديدة راااائعة ماشاء الله
    فيها مقولات مهمة جدا و مفيدة ماشاء الله
    بس اعتقد تغيري اللون شوية:d
    و كمان مش حاساكي لعبتي فيها زي ما بتلعبي كل مرة :d

    منتظرة اشوف النيوو لوك:d

    ردحذف

  12. تم تغيير ألوان المدونة تبعا لرغبة الزوار الكرام :)

    جزاك الله خيرا يا أخي بن توفيق على الدعاء ولا يبدو أني سأكمل الفضفضة وسأكتفي بما ذكرت :)

    العزيزة جدا المجاهدة .. أخيرا يا بنتي شرفتيني بتعليق .. هو لازم الساحة تقع أو دعوة شخصية مني عشان أشوفك هنا ولا ايه :D

    اللهم علمنا ما ينفعنا وإنفعنا بما علمتنا وزدنا علما اللهم آمين ..

    أما اللعب في المدونة فعلى الصيف إن شاء الله على أساس يكون عندي وقت زيادة

    والنيو لوك مستنيك هناك :)

    ردحذف

إنما الأعمال بالنيات وإنما لكل إمرء ما نوى

بحث في فتاتٌ من كلام

Maha's favorite quotes


"إن لمعركة الخبز ضجيجاً يصم الأسماع , والشعوب العابدة لرغيفها سوف تموت دونه , وعلينا أن نوقظ الهمم إلى المعركة الأقسى , معركة الأرض والعرض , معركة الأرض والسماء , معركة الإسلام الذي يترنح من الضربات على كيانه الجلد !!!"— محمد الغزالي