2007/07/10

يوم صيانة

بسم الله

السلام عليكم ورحمة الله وبركاته

الناهرده كان عندي محاضرة لمادة ظريفة وهي إحدى المادتين اللى مقعدني عن السفر لمصر السنة دي : صيانة الحاسوب

المادة دي بنتعلم فيها إزاي نفك الكومبيوتر ونركبه ونتعرف على الأجزاء الصلبة فيه ونسطب عليه اي نظام تشغيل

وكانت محاضرتنا الناهرده إننا نركب اللوحة الأم والهارد ديسك والدي في دي روم والبروسيسور والرامات جوه الكايس

مع بداية المحاضرة عادت بي الذاكرة إلى صيف أحد السنوات حيث جمعنا خالي أنا وأخوتي واولاده وجعلنا نستكشف الحاسوب من الداخل .. وكانت أول نصيحة أن : خدوا بالكم .. جسم الإنسان فيه شحنات كهربائية وعندنا الماذر بورد حساسة وممكن تخرب لو مر فيها تيار كهربي عشان كده مهم إنكم تفرغوا ايديكم من الشحنات .. وعشان تعملوا كده حطوها على جسم الكايس المعدني أو المسوا أحد المسامير اللى فيه

طبعا تقريبا دي الحاجة الوحيدة اللى فاكراها من الشرح ده .. بس الأثر النفسي والذكرى الطيبة التي خلفتها هذه الجلسة لست أظن أنها تقدر بثمن .. إهتمام الآباء والكبار بصفة عامة بالصغار ومواهبهم ومعاملتهم باحترام له بالغ الأثر في نفسية الطفل

عدت إلى الواقع مع علو صوت الدكتور في تحذيرنا من أن جسم الإنسان يحمل شحنات كهربائية قد .... الخ .. وابتسمت ، جزاك الله خيرا يا خالو

بدأنا المرح كله عندما قسمنا الدكتور إلى 4 فتيات في كل مجموعة وأمسكنا بالمفكات التي علمت اليوم المصطلع الكويتي لها لأول مرة في حياتي .. بر .. اممم .. بر .. تباً نسيت اسمه مرة أخرى .. لحظة أرى إن كانت إحدى صديقاتي الكويتيات اون لاين

نعم نعم .. درنفيس .. مفيش "بر" أصلا في الموضوع .. ما علينا

نصف ساعة لأحفظ الاسم راحت هباء .. قلت لهم في آخر الأمر بعد أن ملوا من تلقيني الكلمة .. ماااا تقولوا مفك وتخلصونا .. لازم تعقدوها يعني

رغم أني قضيت حياتي كلها في الكويت لكني مرتبطة جدا بلهجتي ولم أحاول تغييرها أو التحدث بها اللهم إلا مزاحا أو إن تعسر على إحداهن فهمي

لذا كثيرا ما أحب أن أتحدث "بالمصرية جدا " مع صديقاتي المصريات .. احاول استخدام كل مصطلح مصري أعرفه في الحوار .. مشكلة غربة .. ربما

كنا أهدأ مجموعة وأسرعها تنفيذا لخطوات التركيب حتى أن الدكتور إنشغل عنا بباقي المجموعات لدرجة أننا كنا نناديه فيسالنا مندهشا أحقا لم أمر عليكن .. أعتذر .. ثم يذهب وينسانا مرة أخرى

قولوا لي .. مجموعة فتيات في محاضرة صيانة ولم يعد لديهم ما يفعلوه بعد أن انتهوا من مهمتهم في تركيب الجهاز .. ماذا سيفعلون يا ترى ؟؟؟

"جربتي منتجات بودي شوب .. على فكرة مش كلها كويسة "

"المستكه مع ماء الورد ماسك حلو جدا للبشرة .. أنا لسه مجرباه من يومين"

"يوووه أنا بخاف من القطط جدا .. مش بحب أصلا الحيوانات الأليفة في البيت"

وانخرطنا هذه الأحاديث الممتعة والمضيعة للوقت الثمين دون أن نغتاب أحدا الحمد لله ثم حولت الحديث إلى إحدى فتيات مجموعتنا عنها وعن توءمتها المتطابقتين في الشبة وعن حياتهما معا وما إذا كانتا تشعران ببعضهما البعض .... الخ

إنتهى اليوم بعودتي بالحافلة حيث وجدت السائق وقد عرض كارتون توم وجيري (ولأول مرة) في جهاز التلفزيون الموجود في الحافلة التي أستقلها عادة إلى المنزل فاكتملت فرحتي بها اليوم الممتع (بالمناسبة ودون محاولة إغاظة لكن الحافلات عندنا مرفهة جدا .. تكييف محترم وأماكن مخصصة للسيدات وجهاز تلفاز وليست غالية الثمن) فالحمد لله



التعليقات لديها ما يغني التدوينة أكثر .. أراكم هناك إن شاء الله

هناك 20 تعليقًا:

  1. لما المفك اسمه درنفيس الشنيور ياترى هايكون اسمه ايه
    وبعدين كده بردو يامها مستخسرة فينا النسكافيه امال لو طلبنا عصير مانجة كنتى هاتعملى ايه؟

    ردحذف
  2. ههههههههههه

    اللهجة الكويتية - حقيقة لا ذما - فيها كلمات صعبة شوية و.. زي الألماني كده :)

    احم احم .. عصير المانجا ده انتو اللى تجيبوه لأن مفيش احلى من مانجه مصر .. بالمرة بقى هاتي معاك شوبين قصب لأنه وحشني قوي

    ردحذف
  3. بقى كده
    بقى مستخسره فينا النسكافيه
    طب ايه رأيك بقى لو جيتى عندى ملكيش عندى حاجة ساقعه
    انا نجحت وبوزع على الحبايب الحاجة الساقعه
    وانت ملكيش نصيب

    على العموم مفيش أحسن من انك متنسيش لغتك ولا عاداتك
    لأن ده الأصل
    جزاك الله كل خير
    السلام عليكم

    ردحذف
  4. مبارك النجاح :)

    وجزاني وإياك

    وعليكم السلام ورحمة الله وبركاته

    ردحذف
  5. :)

    جميل يا مها ..
    شعرت بنفس إحساسك ..لإني كنت في محاضرة مماثله من عده أسابيع
    :)

    التوفيق دايما

    ردحذف
  6. يا ريت توضيح اكتر بخصوص موضوع الشحنات دا

    يعنى هل ممكن انا اكهرب الكمبيوتر ؟

    ردحذف
  7. ربنا يعينك في الحر
    على فكرة هو دارنفيس وعارف كمان دارسيين اللي هي القرفة
    والشنيور دريل زي الانجليزي
    الحمد لله أي مكان سافرته أو قابلت ناس منه تفهمت لهجتهم جدا ولكن عمري ما اتكلم غير لهجتي أحسها انهزام

    ردحذف
  8. درفننيس

    طويب...ممكن برضه

    ربنا يكون فى عونك...وتجمعى جهاز لوحدك...بس بالراحه عالمروحة بتاعت البروسيسور عشان خفيفة وبتتكسر بسرعه

    صحيح هى تفيدة تقرب حاجه لعم جاابر؟؟؟

    ردحذف
  9. بحب الحرية

    بصراحة أنا مكنتش زهقانة للدرجة دي بالعكس كنت مستمتعة جدا .. الباقي هم اللى زهقوا بسرعة ..

    شكرا لك :) وأرجو لك التوفيق أيضا

    أ/خطاب

    لا مش مسألة حضرتك تتكهرب .. لو الجهاز مفصول من الكهرباء مش حتتكرهب لكن ممكن يحصل تفريغ شحنات بسيط لن تتضرر منه ولكن الماذربورد هي اللى حتنتهي

    أ/عصفور

    آه والله حر جدا جدا .. الحمد لله ..

    وطبيعي إنه خلاص الواحد اتعود على اللهجة الكويتي وبيفهمها من غير مشاكل ، لكن تغيير اللهجة فعلا زي ما حضرتك قلت فيها نوع من الخنوع والخيانة كده

    سفاح

    اه المروحة دي كان ليها معايا حكاية .. المفروض إنها ليها 4 زوايا كل زاوية فيها مسمار بنضغط عليه عشان نثبتها وبعدين المسمار بيتلف أنا بقى أبدعت في النقطتين دول خصوصا إني إجتهدت فيهم من غير ما نشوف الدكتور .. عموما ادينا اتعلمنا في الآخر

    عم جابر وتفيدة ورئيفة كلهم جايين من النوبة بأنواع المشاريب لزوار كل الطلبة ومدونتي بس :D


    ردحذف
  10. :))
    والله هى تفيدة تعبت معانا النهاردة بس يا سلام بقة لو نعناع مع الشاى , يبقى جزاكى الله كل خير

    جميل والله أنك متمسكة بلهجتك بعد كل السنين دى

    ردحذف
  11. يااه منذ مدة لم أر لك تعليقا في مدونتي :) مرحبا بك مجددا

    ردحذف
  12. :D :D :D

    ربنا يوفقك يا بنتى

    وتحفظى اسم المفك


    قادر يا كريم

    ردحذف
  13. عجبني قوي اسم المدونة
    لقمة ..قصدي كلمة واقفة في الزور



    كما عجبني قوي خط المدونة
    مش الفونت
    أقصد المنهج

    تحياتي

    ردحذف
  14. جميل
    تسلم ايدك
    بس احنا كمان عندنا حافلات مكيفة ومخرمة من كل ناحية والهوا يلفحك وانتى قاعدة فى الشتاءزمهرير وفى الصيف سخونة

    فى احسن من كدة تكيييييييف

    جزاك الله خيرا على تمسك بالهوية
    تحياتى

    ردحذف
  15. السلام عليكم ورحمة الله وبركاته
    يعني نطمن على مستقبل مهندسين مصر في الخارج

    جميل أوي فعلا الاهتمام بالأطفال وعقولهم وهما صغيرين

    أكيد الاهتمام ده هو اللي بيولد العبقرية

    والجميل بجد اللي عجبني في خالك إنه قال المعلومة وكأنها لشخص كبير

    كل ده بيتحول ذكريات جميلة أكيد

    موضوعات جميلة يالوتس

    وحشني الرد عليكي زي زمان...

    دنيااااااا .. كانت أيااااام

    ردحذف
  16. سمر

    ويوفقك يا رب

    طيب سيبك مالمفك وخلينا في باقي مصطلحات الجهاز .. هي دي اللى عليها العين

    تسلميلي ويا رب تنوريني كده دايما :)

    طهقان

    الحمد لله رب العالمين

    أشكرك لزيارتك وتعقيبك

    وسلامي إلى طهقانة :)

    في أمان الله

    الطائر الحزين

    سلمك الله .. وجزاني وإياك

    الحافلات في مصر شيء سيء للغاية .. فإنا لله وإنا إليه راجعون

    والحمد لله الذي عافانا

    وربنا يعافي الجميع

    العزيزة الغالية شروق

    وعليكم السلام ورحمة الله وبركاته

    وحشتني تعليقاتك أكتر

    والله يا بنتي الحمد لله إنما الحق يقال أنا لا أعتمد على الكلية كمصدر أساسي للمعلومات .. ولكن مصدر للمعلومات الأساسية..

    يعني ايه الكلام ده

    مش مصدر أساسي للمعلومات يعني مش معظم معلوماتي حول الكومبيوتر بعرفها من الكلية

    لكن مصدر للمعلومات الأساسية يعني بعرف المعلومة الأولية وببني عليها من مصادر المعرفة المختلفة لأكون ثقافتي وعلمي والحمد والفضل لله

    ....

    وأيواااا هو ده .. إنك تكلم الطفل على إنه كبير .. تحترم عقله وذكاؤه وتربيه على إنه كيان يستحق الإحترام والمعاملة الطيبة الذكية

    آه يا بنتي .. أنا تعبت من تذكر الماضي وشوقي لأيامه التي تفوت .. الحمد لله .. هي سنة الحياة

    أنا ما صدقت شوفتك هنا .. متقطعيش الجوابات بقى :D

    إن شاء الله لما أشوفك على الماسنجر فكريني أرشحلك شوية تدوينات كتبتهم تقرأيهم .. حيعجبوك وإن شاء الله يكون فيهم إفادة :)

    ردحذف
  17. امال بقى لو قعدت مع العيانين تحاولى تفسرى الشكوى بتاعتهم .. و خصوصا البدو ... او مثلا اللى اصلهم ايرانى تلاقى الكلام مصرى على ايرانى على كويتى .. كله شغال
    .. اعانك الله على البراغى و الدرنفيس

    ردحذف
  18. أبنتى العزيزة مها
    السلام عليكم ورحمة وبركاتة
    جزاكى اللة عنا خير الجزاء داءما تذكرينا بالاشياء الجيدة والقيمة والمضحكة ايضا أشكرك علي تذكيرى بتلاوة سورة الكهف يوم الجمعة وكذلك الاستغفار بارك الله لكي الهم ينفعك بالاسلام و ينفع الاسلام بكى

    ردحذف
  19. :)

    جميل جدا يا مها

    استمتعي بهذه الاوقات

    فانها لن تعود

    ردحذف
  20. الدكتور :

    ههههههه .. بتحصل كتير وكل مرة بمسك نفسي من الضحك بالعافية .. تعدد الجنسيات هنا أنتج لغة رائعة هي خليط من العربية والخليجية والمصرية والشامية والإيرانية :D

    أ/عصام :

    وعليكم السلام ورحمة الله وبركاته

    جزاني وإياك .. والحمد لله .. أسعدني دعاؤك لي فجزاك الله خيرا

    منة :

    الحمد لله .. آه ما أنا بحاول أستمتع أهو بس الحر مجنني .. الله المستعان .. أحيانا أقصد أقول هو ينفع يبقى فيه حر بعد اللى إحنا فيه ده .. اللهم أعذنا من عذاب جهنم إن عذابها كان غراما .. إنها ساءت مستقرا ومقاما

    ردحذف

إنما الأعمال بالنيات وإنما لكل إمرء ما نوى

بحث في فتاتٌ من كلام

Maha's favorite quotes


"إن لمعركة الخبز ضجيجاً يصم الأسماع , والشعوب العابدة لرغيفها سوف تموت دونه , وعلينا أن نوقظ الهمم إلى المعركة الأقسى , معركة الأرض والعرض , معركة الأرض والسماء , معركة الإسلام الذي يترنح من الضربات على كيانه الجلد !!!"— محمد الغزالي